តាមពិតចឹងសោះ! របរឡើងត្នោតយកទឹកលក់ និងរម្ងាស់ធ្វើជាស្ករ កំពុងតែបាត់បង់ ដោយសារតែ…
របរឡើងត្នោតយកទឹកលក់ និងរម្ងាស់ធ្វើជាស្ករ គឺជាកាងារមួយដែលប្រជាពលរដ្ឋនៅតាមស្រុកភូមិនានាបាននាំគ្នាធ្វើដើម្បីជីវិត ប៉ុន្ដែមកដល់បច្ចុប្បន្ននេះ គេសង្កេតឃើញថា របរនេះ កំពុងតែត្រូវបានបាត់បង់ជាបន្តិចម្តងៗ គឺព្រោះតែមានកត្តាជាច្រើន ទើបបានជាបាត់បង់យ៉ាងដូច្នេះ។
ជាក់ស្តែងផងដែរ របរឡើងត្នោតយកទឹកលក់ និងរម្ងាស់ធ្វើជាស្ករ ពិតជាទទួលបានកម្រៃទាបខ្លាំងណាស់ មិនតែប៉ុណ្ណោះ ថែមទាំងមានហានិភ័យគ្រោះថ្នាក់ខ្លាំងទៀតផង ចំពោះចាស់ៗសម័យមុន ដោយសារតែមិនមានលទ្ធភាពក្នុងការឡើងដើមត្នោតបន្តទៀត ទើបក៏បានបោះបង់ចោរនូវរបរនេះ។
មួយវិញទៀត ចំពោះក្មេងៗសម័យនេះ គឺពួកគេមិនប្រកបរបរនេះឡើយ ដោយពួកគេបានចាប់អារម្មណ៍ទៅលើកាងាររោងចក្រ ដែលអាចទទួលបានប្រាក់ខែសមរម្យ មិនប្រើកម្លាំងច្រើន និងមិនប្រឈមគ្រោះថ្នាក់ខ្លាំង ដូចដែររបរឡើងត្នោតខាងលើនេះទេ ដែលទទួលបានកម្រៃទាប ថែមទាំងមានគ្រោះថ្នាក់ខ្លាំងទៀតផងនោះ។
ចំពោះករណីមួយទៀតនោះគឺ ក្រោយពេលដែលយុវវ័យមួយចំនួនបែរជាមានការផ្តោតទៅលើកាងាររោងចក្រនោះ ធ្វើឲ្យឪពុកម្ដាយ ក៏ដូចជាចាស់ៗនៅក្នុងស្រុកភូមិ បានរវល់ជាមួយនិងការមើលថែចៅ ទើបមិនមានពេលវេលាក្នុងការប្រកបរបរនេះបន្តទៅទៀត ដែលជាមូលហេតុបង្កឲ្យរបរឡើងត្នោតយកទឹកលក់ និងរម្ងាស់ធ្វើជាស្ករ កំពុងតែបាត់បង់បន្តិចៗម្តង។
