ហួសចិត្ត ! យុវជនម្នាក់ខឹងគ្រួសារភ្លេចថ្ងៃកំណើតរបស់ខ្លួន ជិះម៉ូតូយំតាមផ្លូវក្នុងល្បឿនលឿន ប៉ូលិសដេញតាមចាប់ ចុងក្រោយទិញនំខេកឲ្យមួយ
ប្រទេសថៃ៖ កាលពីថ្មីៗមានរឿងដែលគួរឲ្យហួសចិត្តមួយដោយប៉ូលិសម្នាក់នៅឯប្រទេសថៃកំពុងទទួលបានការចាប់អារម្មណ៍យ៉ាងខ្លាំងពីបណ្ដាអ្នកប្រើប្រាស់បណ្ដាញសង្គមហ្វេសប៊ុកក្រោយពីគាត់បានទិញនំខេកឲ្យទៅក្មេងប្រុសវ័យជំទង់ម្នាក់។ បើយោងតាមស្ដីរបស់លោកប៉ូលិស Kanokpan Putthapong បានឲ្យដឹងថា នៅក្នុងយប់ថ្ងៃនោះគាត់បានឃើញក្មេងប្រុសជំទង់ម្នាក់ជិះម៉ូតូក្នុងល្បឿនយ៉ាងលឿនដោយមិនមានពាក់មួកសុវត្ថិភាពនិងមិនមានស្លាកលេខ។ ឃើញដូច្នេះគាត់បានជិះដេញតាមចាប់ក្មេងប្រុសជំទង់រូបនោះ។
នៅពេលដែលដេញតាមទាន់ក្មេងប្រុសជំទង់នោះបានស្រក់ទឹកភ្នែកគាត់ក៏បានសួររកមូលហេតុ។ ក្មេងប្រុសជំទង់បានរៀបរាប់ទាំងទឹកភ្នែកថាគេទើបតែចាកចេញពីខុនដូរបស់បងប្រុស ព្រោះថ្ងៃនេះជាថ្ងៃខួបកំណើតរបស់គេប៉ុន្ដែគ្មានសមាជិកក្នុងគ្រួសារណាម្នាក់ខ្វល់នោះទេ។ ប្រភពបានឲ្យដឹងដែរថាដោយឃើញក្មេងប្រុសជំទង់កំពុងក្រៀមក្រំប៉ូលិសបានប្រាប់គេឲ្យអង្គុយរង់ចាំនៅទីនោះសិនមុននឹងអនុញ្ញាតឲ្យត្រលប់ទៅផ្ទះវិញហើយគាត់ក៏បានទៅហាងលក់អីវ៉ាន់7-11។ មិនយូរប៉ុន្មានលោកប៉ូលិសបានត្រលប់មកវិញជាមួយនឹងនំខេកតូចមួយធ្វើឲ្យក្មេងប្រុសជំទង់រំភើបនិងស្រក់ទឹកភ្នែកម្ដងទៀត។ លោកប៉ូលិសPutthapongបានបង្ហោះរូបភាពរបស់គាត់ជាមួយក្មេងប្រុសជំទង់នោះទៅលើបណ្ដាញសង្គមហ្វេសប៊ុកដោយសរសេរថា៖ «រីករាយថ្ងៃកំណើតប្អូនប្រុស! ឆ្នាំនេះ ប៉ូលិសទិញនំខេកឲ្យប្អូន។»
