ក្រុមអ្នកជិះម៉ូតូឥណ្ឌូនេស៊ីដាច់ផ្ងារជិះម៉ូតូដួល ដោយសារប្រទះមនុស្សចម្លែកមាឌឌាំងកន្តឿរត់លឿនដូចព្យុះនៅខេត្ត Aceh(មានវីដេអូ)
ក្រុមអ្នកជិះម៉ូតូមានមូលដ្ឋាននៅទីក្រុង Banda Aceh ប្រទេសឥណ្ឌូនេស៊ីបានជិះកាត់ក្នុងព្រៃនៅខេត្ត Aceh នៃប្រទេសឥណ្ឌូនេស៊ី ហើយរំពេចនោះ អ្នកជិះម៉ូតូម្នាក់បានដួលដោយសារអ្វីមួយបានរត់កាត់ចំពោះមុខគាត់។ បុរសជិះម៉ូតូពិតភ្ញាក់ផ្អើលដោយឃើញអ្វីមួយមានរាងដូចមនុស្សចម្លែក ភ្លាមៗរត់ចេញពីព្រៃដោយកាន់ដំបងឈើ។
នៅក្នុងវីដេអូដ៏អាថ៌កំបាំងនេះ អ្វីមួយដ៏ចម្លែកនេះហាក់ដូចជាមនុស្សម្នាក់ ប៉ុន្តែមានរាងតូច។ នេះបើយោងតាមកាសែតអនឡាញ tribunnews.com បានរាយការណ៍។អ្វីមួយដែលត្រងោល ព្រលែងខ្លួនល្វែងលើបានឈប់មួយសន្ទុះមុននឹងបន្តរត់យ៉ាងលឿន។ អ្នកជិះម៉ូតូម្នាក់បានព្យាយាមតាមប្រមាញ់ ប៉ុន្តែគួរសោកស្ដាយគាត់មិនបានតាមទាន់ឡើយ ហើយអ្វីមួយនេះក៏លោតចូលក្នុងព្រៃទៅបាត់។
ក្រោយបង្ហោះចូលបណ្ដាញ YouTube ដោយម្ចាស់គណនី Fredography កាលពីថ្ងៃទី ២២ ខែមីនានេះ និងបានល្បីរន្ទឺដោយមានមនុស្សចុចមើលដល់ទៅ ២ លានដង មនុស្សជាច្រើនក៏បានលើកឡើងនូវទ្រឹស្ដីផ្សេងៗគ្នា ដោយអ្នកខ្លះបាននិយាយថា អ្វីមួយដែលហាក់ដូចមនុស្សនេះប្រហែលជាមនុស្សមកពីក្រុមកុលសម្ព័ន្ធឈ្មោះ “Mante”៕