គ្រាន់តែបានឃើញក្រពើយក្សទាំងនេះហើយ ព្រឺក្បាលខ្ញាកមិនបាត់សោះ ហើយប្រវែងរបស់វារហូតដល់ទៅ…
មនុស្សភាគច្រើនប្រហែលមិនដែលលឺទាល់តែសោះ ពូជក្រពើយក្ស Sarcosuchus ដែលធ្លាប់រស់នៅលើផែនដីក្នុងសម័យបុរេប្រវត្តិ។ ក្រពើមួយនេះ មានប្រវែងដងខ្លួនដល់ទៅ ១២ម៉ែត្រ ពេលវាលូតលាស់ពេញរូបរាង ហើយអាចមានទម្ងន់ដល់ទៅ ៨តោន ប្រហែលឡាន Camry ៥គ្រឿង(ទម្ងន់ឡាន Camry ជាមធ្យម ១តោនកន្លះ)។ ទោះបែបនេះក្ដី សព្វថ្ងៃអ្នកវិទ្យាសាស្រ្តបានត្រឹមសិក្សាលើគ្រោងឆ្អឹងប៉ុណ្ណោះ ព្រោះវាផុតពូជ ១១២លានឆ្នាំទៅហើយ។
នៅឆ្នាំ ១៩៦៤ គ្រោងឆ្អឹងក្បាលដំបូងត្រូវបានគេរកឃើញ ហើយក្រុមអ្នកវិទ្យាសាស្ត្រក៏បានធ្វើការសិក្សា និងបង្កើតជាសំណាករូបរាងឡើង ដើម្បីប៉ាន់ប្រមាណពីទំហំរបស់ក្រពើយក្សនេះ។ ក្រោយមក ក្រុមអ្នកស្រាវជ្រាវបានរកឃើញផូសីលមួយចំនួនទៀត រួមមានឆ្អឹងកង ឆ្អឹងជំនី ព្រមទាំងផ្នែកផ្សេងៗនៃគ្រោងឆ្អឹងខ្នង។ ទោះបីជាមិនពេញលេញក៏ដោយ ក៏គេនៅតែអាចកំណត់បានពីទំហំខ្លួនមហិមារបស់ក្រពើយក្ស។
ពូជក្រពើយក្ស Sarcosuchuមិនត្រឹមតែមានទំហំធំជាង ក្រពើបច្ចុប្បន្ននោះទេ គឺថែមទាំងអាចរស់នៅលើផែនដីបានយូរទៀតផង។ ក្រពើភាគច្រើនមានអាយុកាលជាមធ្យមក្នុងរយៈពេល ២៥ឆ្នាំដោយមានខ្លះមានអាយុចាប់ពី ៣០ ឆ្នាំឡើងទៅ។ ប៉ុន្តែសម្រាប់ក្រពើយក្ស Sarcosuchu អាចមានអាយុប្រហែលសែសិបឆ្នាំ ហើយមិនបានលូតលាស់យ៉ាងពេញលេញនៅឡើយទេ ពេលដែលវាបានស្លាប់។
ក្នុងនាមជាឃាតករដ៏សាហាវ ក្រពើយក្ស Sarcosuchus ត្រូវផ្តោតការយកចិត្តទុកដាក់លើការប្រមាញ់ចំណី ដែលអាចផ្តល់អាហារគ្រប់គ្រាន់ដើម្បីរក្សារាងកាយរបស់ខ្លួន។ ក្រុមសត្វសំខាន់ៗពីរ ដែលអាចចម្អែតក្រពះរបស់ក្រពើយក្សបាន គឺដាយណូស័រនិងត្រីធំ។ ពេលប្រហារចំណី ក្រពើយក្សបានប្រើប្រាស់ធ្មេញដ៏មុតស្រួច លួចខាំដាយណូស័រ រួចអូសទម្លាក់ទឹក ដើម្បីប្រហារជីវិតតែម្ដង។
អ្វីដែលពិសេស គឺក្រពើយក្សមានមានច្រមុះធំ និងធ្មេញរឹងមាំដែលល្អឥតខ្ចោះសម្រាប់ដោះស្រាយបញ្ហាជាមួយសត្វព្រៃដ៏ធំនិងមានអំណាចដទៃទៀត ដែលអាចបង្កគ្រោះថ្នាក់។ បើតាមការស្រាវជ្រាវ ក្រពើនេះ មានប្រភពនៅអាហ្វ្រិក ហើយមានហ្វូស៊ីលមួយចំនួន ត្រូវបានប្រទះឃើញនៅប្រទេសប្រេស៊ីល ដែលស្ថិតនៅទ្វីបអាមេរិកឡាទីន។ ទោះបែបនេះក្ដី ហ្វូស៊ីលទាំងនេះ នៅមិនទាន់ច្បាស់ថា អាចបានមកពីក្រពើយក្សពូជផ្សេងទៀត ឬយ៉ាងណានោះទេ៕
ប្រភព៖ morningfresh