ពិតជាគួរឲ្យខ្មាសសត្វស្វាណាស់!!! មិនគួរជឿ! វីរបុរសស្វាខំសង្គ្រោះមិត្តឆក់ខ្សែភ្លើង រហូតរួចផុតពីស្លាប់ ឯមនុស្សជាច្រើនបានត្រឹមឈរថត (វីដេអូ)
កុំថាឡើយមនុស្ស ទោះបីសត្វមួយចំនួន ក៏ចេះជួយជីវិតគ្នាគួរឱ្យរំភើបចិត្ត។ ជាក់ស្ដែង សត្វស្វាមួយក្បាល បានធ្វើឱ្យមនុស្សជាច្រើនភ្ញាក់ផ្អើលយ៉ាងខ្លាំង ព្រោះព្យាយាមជួយសង្គ្រោះសត្វស្វាមួយក្បាលទៀតដែលឆក់ខ្សែភ្លើងឱ្យដឹងខ្លួនឡើងវិញ រួចផុតពីសេចក្ដីស្លាប់។ ហេតុការណ៍នេះ បានកើតឡើងនៅស្ថានីយរថភ្លើងមួយរបស់ប្រទេសឥណ្ឌា ប៉ុន្តែមិនដឹងកាលបរិច្ឆេទច្បាស់ឡើយ។
បើតាមប្រភពព័ត៌មានមួយចំនួនបានឱ្យដឹងថា ដំបូងឡើយ គេឃើញស្វារងគ្រោះ បានឆក់ខ្សែភ្លើងដែលមានតង់ស្យុងខ្ពស់ រហូតលែងដឹងខ្លួនទៅហើយ។ ប៉ុន្តែស្វាមួយក្បាលទៀត មិនបានទុកគ្នាវាចោលឡើយ គឺព្យាយាមទៅជួយ ដើម្បីឱ្យរស់រានមានជីវិតឡើងវិញ។ ស្វាមួយក្បាលទៀតនោះ បានលើកអង្រួនយ៉ាងប្រញាប់ រួចចាប់ស្វារងគ្រោះជ្រលក់ចូលក្នុងទឹក លើកមកវិញអង្រួនទៀត ព្រមទាំងខាំក្បាលផងដែរ។
មនុស្សជាច្រើន នៅស្ថានីយរថភ្លើង បានត្រឹមតែឈរមើល រួចនាំគ្នាដកទូរសព្ទថតប៉ុណ្ណោះ។ ប្រហែលជាគ្រប់គ្នា គិតថាស្វានោះបានងាប់បាត់ទៅហើយ ព្រោះគ្មានកម្រើកសូម្បីបន្តិច ទើបមិននាំគ្នាជួយឈឺឆ្អាល។ អ្វីដែលនឹកស្មានមិនដល់ ក្រោយពេលប្រឹងជួយសង្គ្រោះបានប្រមាណ ២០នាទី ស្រាប់តែស្វារងគ្រោះដឹងខ្លួនឡើងវិញ និងអង្គុយដោយអស់កម្លាំង ក្រោមការមើលថែពីស្វាដែលជួយសង្គ្រោះនោះ។
វីដេអូនេះ បានទាក់ទាញមនុស្សជាច្រើន ឱ្យចែករំលែកបន្ត និងបង្ហោះបន្តរាប់លានដង។ អ្នកដែលបានមើលវីដេអូនេះហើយ បាននិយាយថា មនុស្សគួរយកតម្រាប់តាមស្វានេះ ត្រូវចេះជួយគ្នា មិនមែនគិតតែពីខ្លួនឯងនោះទេ។ ចំណែកអ្នកខ្លះទៀត បានសរសើរថា ទឹកចិត្តស្វាមួយក្បាលនេះ លើសមនុស្សខ្លះផង ព្រោះមនុស្សខ្លះបានត្រឹមតែគិតខ្លួនឯង មិនគិតចេះជួយអ្នកដទៃពេលជួបគ្រោះថ្នាក់ដូចគ្នានេះឡើយ។
គួរបញ្ជាក់ដែរថា ស្វាគឺជាសត្វមួយប្រភេទ ដែលមានចលនា និងកាយវិការស្រដៀងមនុស្សបំផុត។ សព្វថ្ងៃនេះ ពូជស្វាដែលគេអាចកំណត់បាន មានរហូតដល់ 264 ប្រភេទទូទាំងពិភពលោក ដោយរាប់ទាំងស្វាធំ និងស្វាអូរ៉ង់អូតង់ ដែលគេបង្ហាត់បង្រៀនឱ្យសាំនឹងការរស់នៅជាមួយមនុស្សផងដែរ។ ភាគច្រើន ពួកវាចូលចិត្តរស់នៅក្នុងព្រៃជ្រៅ ដោយស៊ីផ្លែឈើជាអាហារ៕
ប្រភព៖ morningfresh