​នៅចាំបុរសកំសត់ម្នាក់នេះទេ? ព្រោះតែក្ដុកក្ដួលខ្លាំងពេក ទើបព្រះអង្គម្ចាស់បា​រ៉ែ​ន​ ជួយឧបត្ថម្ភលុយចំនួនជាង ១ ម៉ឺនដុល្លារ

ប្រទេសឥណ្ឌា៖ ក្រោយពី​រូបថត ក៏ដូចជាវីដេអូដ៏កំសត់​របស់លោក Dana Majhi ដែលលី​សាកសព​ប្រពន្ធរបស់ខ្លួនទទួលបានការចាប់អារម្មណ៍ និង ​ល្បី​ល្បាញពេញ​បណ្តាញ​ផ្សព្វផ្សាយរួចមក មានមហាជន​ជាច្រើនលើសាកលលោក បាននាំគ្នា​រិះគន់ខ្លាំងៗ ទៅលើ​មន្ទីរពេទ្យ​ឥណ្ឌា​ ។ ការរិះគន់នេះដែរ គឺដោយសារ ភាពដាច់មេត្តា សុខចិត្ត​ទុកឱ្យ​បុរសម្នាក់​នេះ​សែង​សាកសព​ប្រពន្ធ​ដើរ​ក្នុងរយៈចម្ងាយ ១០ គីឡូម៉ែត្រ ទម្រាំ​យក​រថយន្ត​មកជួយ​ដឹក​សព​ទៅ​ស្រុកកំណើត ដែល​នៅសល់​ប្រមាណ ៦០ គីឡូម៉ែត្រ​ទៀត​។​

​មានប្រព័ន្ធ​ផ្សព្វ​ផ្សាយយ៉ាងច្រើន បាន​ចុះផ្សាយ​បង្ហាញពី​ការឈឺចាប់​របស់លោក Majhi ហើយក្នុងនោះ ​ប្រជាជន​ទូទាំង​ឥណ្ឌា និង​ពិភពលោក​ទាំងមូល​បាន​ដឹង​យ៉ាងច្បាស់ ​អំពី​សាច់រឿង​ដ៏​កម្សត់​របស់​បុរស​រូប​នេះ​។ ទាក់ទងជាមួយគ្នានេះដែរ កាលពីពេលថ្មីៗនេះមានដំណឹងថា លោក Majhi បានទទួល​ប្រាក់​ជំនួយ​ពី​នាយករដ្ឋមន្ត្រី​បា​រ៉ែ​ន គឺ​ព្រះអង្គម្ចាស់ Khalifa Bin Salman Al Khalifa ចំនួន ១៣.៣០០ ដុល្លារ​អាមេរិកតាម​ការសន្យា​របស់​ទ្រង់​។ លោក Majhi បានទទួល​ប្រាក់​នេះ​ពី​ស្ថានទូត​បា​រ៉ែ​ន ​ប្រចាំ​ទីក្រុង Delhi កាលពី​ថ្ងៃ​ព្រហស្បតិ៍ ទី ១៥ ខែកញ្ញា ឆ្នាំ ២០១៦ កន្លងទៅនេះ​។ នាយករដ្ឋមន្ត្រី​បា​រ៉ែ​ន ដែលជា​សមាជិកគ្រួសារ​រាជវង្ស​មាន​ទ្រព្យបំផុត​មួយ​ក្នុង​ពិភពលោករូបនេះ មាន​ព្រះ​ហឫទ័យ​ក្តុកក្តួល​ជាខ្លាំង បន្ទាប់ពី​ទ្រង់​បាន​ទត​ឃើញនូវ​ការលំបាក​ និង កំសត់របស់​​បុរសកំសត់ ​Majhi។

តាមប្រភពព័ត៌មានបានឲ្យដឹងថា ​បុរសពោះម៉ាយ Majhi មានចិត្តត្រេកអរជាពន់ពេក ដែល​បានទទួល​ប្រាក់​ជំនួយទាំងអស់នេះ ហើយ​លោក​និយាយថា លោក​អាច​លៃលក​ប្រាក់​នេះ​ល្មម​សម្រាប់​ឱ្យ​កូនស្រី​ទាំង ៣ រៀបការ​(​តាមប្រពៃណី​ឥណ្ឌា​គឺ ​ខាង​ស្រី​ត្រូវ​ដណ្តឹង​ខាង​ប្រុស​)​។ ស្របពេលជាមួយគ្នានេះដែរ មានបណ្តាញ​ផ្សព្វផ្សាយ​ឥណ្ឌាជាច្រើន ​បាន​ជួយ​រួមចំណែក​សម្រាលដល់​ការលំបាក​របស់លោក Majhi ដោយ​ការផ្សព្វផ្សាយ​ពី​សកម្មភាព​លី​សព​ប្រពន្ធ​ចម្ងាយ ១០ គីឡូម៉ែត្រឲ្យពិភពលោកបានមើលឃើញ​។ អាជ្ញាធរ​ពេទ្យ​ដែល​បដិសេធ​ដឹក​សាកសព ភ្លាមនោះ ក៏​បានសម្រេច​បញ្ជូន​រថយន្ត​ចេញទៅ​ដឹក​សព​ប្រពន្ធរបស់លោ​ក Majhi ​យ៉ាង​ប្រញាប់ក្នុងអំឡុងពេល​រង​សម្ពាធ​រិះគន់​ និង​កំហឹង​របស់​ប្រជាជន​ទូទាំងប្រទេស​។ មន្ទីរពេទ្យ​គ្មានចិត្តធម៌នោះ មានទីតាំង​ស្ថិតនៅក្នុង​ទីក្រុង Bhawanipatna រដ្ឋ Odisha​។

គួរបញ្ជាក់ដែរថា គ្រា​ដែល​រថយន្តមន្ទីរពេទ្យ​ចេញមកជួយ​ដឹកសាសពប្រពន្ធរបស់ Majhi ​នោះ គឺខ្លួនគេ​បាន​លី​សាកសពប្រពន្ធ​ដើរ​បានចម្ងាយ ១០ គីឡូម៉ែត្រ​រួចទៅហើយ និង​នៅសល់ ៦០ គីឡូម៉ែត្រ​ទៀត​ទើប​ដល់ផ្ទះ​ដែលស្ថិត​នៅក្នុង​ភូមិ​មួយ ​ក្នុង​រដ្ឋ​តែមួយខាងលើនេះ​។​ ​រឿងនេះ​មិនទាន់​អាម៉ាស​ខ្លាំង​សម្រាប់​ប្រទេស​ឥណ្ឌា​នៅឡើយ​ទេ អ្វីដែល​អាម៉ាស​បំផុត​គឺ​នាយករដ្ឋមន្ត្រី​ស្រុក​បា​រ៉ែ​ន មកជួយ​ប្រជាជន​ស្រុក​ឥណ្ឌា​។ ប្រជាជន​ឥណ្ឌា​ទូទាំងប្រទេស​មាន​អារម្មណ៍​ខ្មាស់​គេ​ពេញ​ពិភពលោក នៅពេល​ទទួលដំណឹង​ថា ព្រះអង្គម្ចាស់​ប្រទេស​ដទៃ​ចេញមុខ​មកជួយ​បុរស​ឥណ្ឌា​រូបនេះ ខណៈដែល​ប្រទេស​សាមីខ្លួន​ធ្វើជា​មិនដឹងមិនឮ​ ឬ ​អើពើ​ជួយ​លោក Majhi បន្តិច​ឡើយ​៕

 

Leave a Reply

Your email address will not be published. Required fields are marked *