គេកូនអ្នកមាន សង្ហា រៀនខ្ពស់ បែរអូនជ្រើសរើសយកបុរសសាមញ្ញម្នាក់នេះ
គូស្នេហ៍ទើបក្លាយជាប្ដីប្រពន្ធថ្មីថ្មោងមួយគូ កំពុងទទួលការចាប់អារម្មណ៍ ការកោតសរសើរ និងការជូនពរជាច្រើននៅតាមបណ្ដាញសង្គម បន្ទាប់ពីឃើញសំណេរ និងរូបថតដ៏ផ្អែមល្ហែមមួយសន្លឹកនៅមាត់ឆ្នេរ។
បុរសនារី២នាក់ បានគ្នាគូមិនមែនជារឿងងាយស្រួល និងភ្លែតភ្លាមពេកទេ ពេលវេលាជារឿងសំខាន់ណាស់ក្នុងអំឡុងពេលនេះ។ អ្នកទាំងពីរត្រូវការពេលវេលាសម្រាប់ស្វែងយល់ពីគ្នា មើលអាកប្បកិរិយា ឬចំណង់ចំណូលចិត្តគ្នាសិន មុនហាស្ដីពោលពាក្យស្រលាញ់ រួមរស់នឹងគ្នាអស់មួយជីវិត បើជ្រើសរើសខុសនឹងកើតជាវិប្បដិសារី។ ភាពស្មោះស្ម័គ្រ និងទុកចិត្តគ្នា ក៏ត្រូវស្ដែងឲ្យឃើញនៅពេលនេះដែរ។
បុរសទើបក្លាយជាស្វាមីម្នាក់ បានបង្ហាញអារម្មណ៍មិននឹកស្មាន និងកោតសរសើរចំពោះខ្លួនឯង ដែលនារីម្នាក់ព្រមទទួលជ្រើសរើសយកខ្លួនធ្វើជាគូអនាគត ស្របពេលមានបុរសជាច្រើន និងគ្រាន់បើជាងខ្លួនជាច្រើន កំពុងសម្លឹងមើលនារីម្នាក់នេះដូចគ្នា។ លោកបង្ហើបថា លោកត្រូវប្រឈមជាមួយគូប្រជែងជាកូនអ្នកមាន រៀនបានខ្ពស់មួយចំនួន ប៉ុន្តែដោយសារភាពស្មោះត្រង់ ភាពផ្អែមល្ហែម និងទុកចិត្តគ្នា បានធ្វើឲ្យបុប្ផាមួយទងនេះ ប្រគល់បេះដូងជូនលោក។
អ្នកប្រើប្រាស់គណនីហ្វេសប៊ុកឈ្មោះ Rak បានសរសេររៀបរាប់ដូច្នេះថា «មានមនុស្សជាច្រើន គេប្រាប់បងថា បងជាមនុស្សម្នាក់ដែលសំណាងណាស់ដែលបានអូនជាគូជីវិត ជាឧត្តមភរិយា។ មានគេប្រាប់បងទៀតថា មនុស្សជាច្រើនដែលគេចង់បានអូន គេស្រលាញ់អូនតែអូនបដិសេធគេគ្រប់គ្នា មិនទទួលក្តីស្រលាញ់ពីអ្នកណាក្រៅពីបងឡើយ។ ទោះបីជាគេនោះជាកូនអ្នកមាន សង្ហា រៀនមានចំណេះដឹងខ្ពង់ខ្ពស់ ឬការងារល្អយ៉ាងណាក៏ដោយ ក៏អូនមិនជ្រើសរើសយកអ្នកណាក្រៅពីបងដែរ។
ព្រោះអូនពេញចិត្តតែបងម្នាក់ ពេញចិត្តអ្វីដែលបងមាន និងអ្វីគ្រប់យ៉ាងដែលបងផ្តល់ឲ្យអូន ទោះបីជាពេលខ្លះមានគេព្យាយាមបំបែកបំបាក់យើង និយាយអាក្រក់ពីបង អោយអូនស្តាប់។ ខ្លះទៀតនិយាយអាក្រក់ពីអូនអោយបងស្តាប់វិញ តែយើងទាំងពីរនាក់មិនខ្វល់ពីអ្នកដទៃឡើយ ហើយនៅតែជឿជាក់លើគ្នាដោយក្តីស្រលាញ់ពិតប្រាកដ។
ជាចុងក្រោយបងចង់និយាយថា បងនឹងមើលថែរក្សាអូនឲ្យល្អ ទោះបីជាបងមិនមែនជាកូនអ្នកមាន មិនធូរធារ មិនមានចំណេះដឹងខ្ពង់ខ្ពស់ដូចគេ តែអ្វីដែលអូនចង់បាន អ្វីដែលអូនប្រាថ្នា បងព្យាយាមរកឲ្យអូនអស់ពីលទ្ធភាព ទោះបីជាបងត្រូវលំបាកយ៉ាងណាក៏ដោយ ស្រលាញ់ #Theary។
ស្នេហាមានឧបសគ្គច្រើនណាស់តែយើងមិនរាថយឡើយ ស្រលាញ់គ្នាពិតប្រាកដត្រូវតែស៊ូយកឈ្នះឧបសគ្គគ្រប់បែបយ៉ាង ទើបគេហៅថាក្តីស្រលាញ់ពិតប្រាកដ។ ហៅថា «ប្តីប្រពន្ធ» លុះត្រាតែ៖ ដឹងថាពូកែរករឿង តែស្ម័គ្រចិត្តឲ្យរករឿង។ ដឹងថារអ៊ូ តែសុខចិត្តស្តាប់ដូចចម្រៀងបំពេ។ ដឹងថាឈ្លោះគ្នាខ្លាំង តែនៅតែលើកលែង។ ដឹងថារស់នៅពិបាក តែចង់រស់នៅជាមួយគ្នា។ ដឹងថានឹងមានបញ្ហាលំបាក តែនឹងឆ្លងកាត់ជាមួយគ្នា។
ដឹងថាហត់នឿយ តែនឹងមិនបោះបង់គ្នា។ ដឹងថាក្រីក្រ តែនឹងតស៊ូជាមួយគ្នា។ ដឹងថាមិនស្អាត មិនសង្ហាលើសគេ តែនៅតែត្រូវការគ្នា។ ដឹងថានឹងឈឺ តែនឹងមើលថែគ្នា។ ដឹងថាមានអ្នកដទៃល្អជាង តែនឹងមានភក្តីភាពជាមួយគ្នា។ ដឹងថាមានគេផ្អែមជាង តែយើងនឹងមិនក្បត់គ្នា។ សារដ៏មានអត្ថន័យសម្រាប់គូស្នេហ៍ទាំងអម្បាលម៉ានខាងលើ ធ្វើឲ្យមិត្តភ័ក្ដិពួកគេ ក៏ដូចអ្នកប្រើប្រាស់ហ្វេសប៊ុកដទៃទៀត រំជួលចិត្ត កោតសរសើរតាមដែរ៕
